Адвокатите на кандидатот за претседател на САД, Доналд Трамп, изјавија за „Би-Би-Си“ дека ништо нема да се промени во неговата кандидатура за нов претседателски мандат и покрај тоа што беше осуден по историското судење во Њујорк.

Трамп во четвртокот беше прогласен за виновен за фалсификување деловни досиеја за да ги прикрие плаќањата на поранешната порно актерка Сторми Даниелс за време на претседателската кампања во 2016 година.

Трамп стана првиот американски претседател кој беше осуден за кривично дело, но тој рече дека судењето е наместено и дека прогонот бил политички организиран.

Адвокатот на Трамп, Алина Хаба, во емисијата „Недела со Лора Куенсберг“ изјави дека поранешниот претседател е „жртва на политички и селективен прогон“. По седумнеделното судење во Кривичниот суд на Менхетен, Трамп беше прогласен за виновен по 34 точки од обвинението. Трамп ќе биде осуден на 11 јули. Сепак, тој потврди дека ќе поднесе жалба на своите кривични пресуди.

Хаба рече дека Трамп ќе се кандидира на претседателските избори во САД во ноември, дури и ако биде затворен.

„Видовме одредена корупција во оваа земја која, искрено, никогаш досега не била видена во нашиот правосуден систем“, рече Хаба.

„Тоа е многу реално, тоа не е шега, тоа е 100 отсто проблем со кој оваа земја ќе мора да се соочи и да се справи. Тој ќе се кандидира за претседател, ништо нема да го промени тоа. На луѓето им треба во оваа земја, затоа што искрено, а тоа е поважно од што било друго. Нашите луѓе зборуваат, донираат (…)“, рече таа.

Трамп пред два дена луто ги напаѓаше своите политички противници, поротата и судијата во неговиот случај повеќе од 30 минути. Тој го нарече судијата Хуан Мерчан „тиранин“ и тврдеше дека „буквално ги распнал“ сведоците.

Кампањата на Бајден го опишува Трамп како „неурамнотежен“ и „гладен за одмазда“.