Спирален сегмент од оригиналните скалила на Ајфеловата кула е продаден за повеќе од 450 илјади евра на аукција во Париз во четвртокот. Купувачот, кој бил присутен во аукциската сала, станал сопственик на дел од скалилата со 14 скалила, висок 2,7 метри и тежок 1,4 тони, кој датира од 1889 година, кога бил завршен споменикот што се издига над центарот на Париз.

„Кога купувате дел од Ајфеловата кула, купувате дел од Париз, заедно со сета имагинација и симболика што тој ја претставува“, изјави Сабрина Дола, директорка за Арт Деко дизајн во париската аукциска куќа Artcurial, каде што се одржа продажбата.

Пред повеќе од четири децении, вкупно 160 метри од скалилата биле исечени на помали делови и продадени, а биле заменети со лифтови кои денес ги превезуваат посетителите до највисокиот видиковец на Ајфеловата кула.

Делот продаден во четвртокот постигна цена од 450.160 евра, што е трипати повеќе од горната граница на проценетата претпродажна вредност, која изнесуваше помеѓу 120 и 150 илјади евра.

Во 2008 година, еден дел му беше продаден на приватен американски купувач за рекордни 550 илјади евра.