Експерти за експлозивни направи на ирската војска во петокот деактивирале импровизирана експлозивна направа во деловна зграда во центарот на Даблин, во близина на местото каде што претходната вечер била организирана вечера за светските лидери кои учествуваа на самитот на Европската политичка заедница.

Ирската полиција соопштила дека во четвртокот добила пријава за сомнителна направа во зграда на плоштадот Мерион, по што на терен бил повикан специјален тим за отстранување експлозивни средства (ЕОД) при одбранбените сили. Тимот ја онеспособил направата, а истрагата за инцидентот е во тек, пренесе „Ројтерс“.

Инцидентот се случил во непосредна близина на Националната галерија на Ирска, каде што во четвртокот вечерта на вечера се собрале лидерите на земјите членки на Европската политичка заедница, во која учествуваат и држави надвор од Европската Унија.

На вечерата присуствувале, меѓу другите, францускиот претседател Емануел Макрон, британскиот премиер Енди Бернам и канадскиот премиер Марк Карни.

Поради самитот, околу Националната галерија бил поставен безбедносен кордон, а околните улици во близина на плоштадот Мерион биле затворени за сообраќај.

Украинскиот претседател Володимир Зеленски исто така учествувал на самитот, но не присуствувал на вечерата бидејќи во предградие на Даблин имал средба со специјалните пратеници на американскиот претседател, Џаред Кушнер и Стив Виткоф.

Ирската полиција соопштила дека дводневниот самит претставувал најголемата безбедносна операција што некогаш ја спровела. Неформалниот состанок на лидерите на ЕУ бил одржан на друга локација, оддалечена околу 1,5 километри од местото каде што била пронајдена експлозивната направа.