Израелскиот премиер Бенјамин Нетанјаху порача дека Израел засега ќе ги прекине нападите врз Иран, но нагласи дека борбата против Техеран и Хезболах не е завршена и дека Израел ќе продолжи да одговара на секој напад врз својата територија.

„По нападот на Иран врз Израел, им наредив на Израелските одбранбени сили да нападнат воени и економски цели низ Иран“, рече Нетанјаху во, како што изгледа, однапред снимена видеопорака.

„Во моментов огнот на овој фронт е запрен, бидејќи по ударот врз терористичкиот режим во Техеран тој престана да нè напаѓа“, изјави Нетанјаху, предупредувајќи дека „ако тој терористички режим повторно направи грешка и нè нападне, одговорот ќе биде жесток“.

„Иран и Хезболах денес се послаби од кога било, а ние сме посилни од кога било. Но нашата борба против нив сè уште не е завршена“, порача израелскиот премиер.

Тој додаде дека израелската војска ќе продолжи да дејствува во јужен Либан за да ја „уништи целата терористичка инфраструктура на Хезболах во безбедносната зона“.

„Во изминатиот ден Иран и Хезболах се обидоа да наметнат нова равенка. Таа равенка за мене е неприфатлива и целосно недозволива. Мислеа дека можат да започнат напади од Либан и Иран врз Израел, а ние да не реагираме. Тоа не се случи и нема да се случи. Не додека јас сум на власт“, изјави Нетанјаху.

Тој потврди дека истата порака му ја пренел и на американскиот претседател Доналд Трамп, кој во последните денови повеќепати го повика Израел на деескалација за да се зачуваат преговорите меѓу САД и Иран за можен договор.

„Израел има целосно право на самоодбрана и ние ќе го користиме тоа право секогаш кога ќе биде потребно. Тоа ви го велам вам, драги граѓани на Израел, како што го велам и во моите добри разговори со мојот пријател, претседателот Трамп“, рече Нетанјаху.