Во период кога Индија забрзано го проширува своето глобално економско присуство, Македонија може да се позиционира како една од точките преку кои индиските компании ќе ги приближат своите производи, услуги и инвестиции до европскиот пазар.
Историската посета на индиската претседателка на Македонија Друпади Мурму ,отвора можност за ново ниво на економска соработка меѓу двете држави. Покрај политичката порака, клучен е економскиот аспект за создавање услови за индиските компании да ја препознаат Македонија како партнер и потенцијална локација за свои деловни активности.
За големите економии како Индија, пристапот до нови пазари е еден од главните двигатели на економската експанзија. Индиските компании последните години се повеќе се ориентираат кон глобално проширување, а Европа останува еден од најважните пазари во светот. Во тој контекст, Македонија има можност да ја искористи својата географска положба и економска поврзаност со европскиот простор.
Македонија може да биде интересна како производствена и логистичка база за компании кои сакаат полесен пристап до европските потрошувачи. Близината до земјите од Европската Унија, квалификуваната работна сила, инфраструктурната поврзаност и условите за инвестирање се фактори кои можат да придонесат индиските компании да ја разгледуваат земјата како дел од своите европски стратегии.
Потенцијалното зголемување на индиското економско присуство би можело да донесе повеќекратни придобивки за домашната економија. Нови инвестиции значат можност за отворање нови работни места, зголемување на производството, раст на извозот и поголема вклученост на македонските компании во меѓународните синџири на снабдување.
Особено значајно е што Индија не е само голем пазар, туку и една од најбрзорастечките економии во светот. Со бруто-домашен производ од околу четири трилиони долари, висок економски раст и силна извозна ориентација, Индија претставува партнер чие економско поврзување може да отвори нови перспективи за малите економии како Македонија.
Според Светската банка, индиската економија продолжува да расте со високи стапки и останува меѓу најдинамичните големи економии. Растот е поддржан од силната домашна побарувачка, инвестициите и извозот, особено во секторите на услугите, информатичката технологија и деловните активности. ММФ, исто така, ја оценува индиската економија како отпорна, со стабилен финансиски и корпоративен сектор.
Токму ова искуство може да биде важно за Македонија. Индиските компании не носат само капитал, туку и знаење, технологии и пристап до глобални деловни мрежи. Влезот на компании од една од најголемите светски економии може да придонесе за развој на домашната индустрија и зголемување на конкурентноста на македонските компании.
За Македонија, која е мала и отворена економија, секое ново поврзување со големите светски пазари има стратешко значење. Поголемата трговска размена со Индија може да создаде нови можности за домашните производители, но и да ја зголеми атрактивноста на земјата за други странски инвеститори.
Посетата на индиската претседателка треба да се гледа како отворање врата кон нови економски процеси. Доколку политичкиот импулс се претвори во конкретни бизнис-проекти, Македонија може да добие нов извор на инвестиции и економски раст, а индиските компании можност за подобро позиционирање на европскиот пазар.
Во глобална економија каде што конкуренцијата за инвестиции станува сè поголема, партнерството со Индија претставува можност Македонија да ја зајакне својата позиција и да стане уште поатрактивна точка за меѓународниот бизнис.
