Северна Кореја има доволно плутониум и ураниум за да може да произведе најмалку двоцифрен број нуклеарно оружје, изјави утринава јужнокорејскиот пратеник Ли Сеонг-квон, цитирајќи ја јужнокорејската разузнавачка агенција.

Ли рече дека јужнокорејската разузнавачка агенција верува дека постои голема веројатност Северна Кореја да го изврши седмиот нуклеарен тест по претседателските избори во САД на 5 ноември, пренесува Танјуг.

Јужнокорејски пратеник истакна дека ретко се случува севернокорејските државни медиуми да известуваат за посетите на севернокорејскиот лидер Ким Џонг-ун на постројка за збогатување ураниум, така што покривањето на неговата посета на почетокот на овој месец веројатно би можело да испрати порака до Вашингтон пред претседателските избори во САД.

Ли исто така истакна дека најавите за посетата на Ким би можеле да бидат и за домашни цели, бидејќи економската ситуација во Северна Кореја е тешка, објави Ројтерс.

Пјонгјанг претходно изјави дека неговиот арсенал на нуклеарно оружје и балистички ракети е неопходен за да се спротивстави на заканите од САД и нивните сојузници.

Федерацијата на американски научници во јули заклучи дека Пјонгјанг можеби произвел доволно материјал за да изгради до 90 нуклеарни боеви глави.