Побарувачката за злато во Индија за време на претстојната сезона на хинду фестивали најверојатно ќе остане силна, а цените на златото би можеле да достигнат нови рекордни височини, велат аналитичарите.

Индија ги намали царинските давачки за злато пред овие фестивали, па може да се очекува дека побарувачката ќе се зајакне во вториот најголем потрошувач на злато во светот. И ова може да предизвика дополнителен раст на цените на златото ширум светот, кои достигнаа рекордни нивоа минатата недела.

„Намалувањето на царините најмногу им користи на потрошувачите“, рече Сачин Џаин, извршен директор на бизнисот во Индија на Светскиот совет за злато.

Во јули, Индија ги намали увозните давачки за злато од 15 на шест отсто, со цел да се спречи шверцот. Џаин рече дека побарувачката во текот на претстојната фестивалска сезона ќе биде многу голема.

Побарувачката за злато во Индија има тенденција да расте кон крајот на годината, што се совпаѓа со традиционалната сезона на венчавки и големите фестивали, вклучувајќи ги Дивали и Душера, кога купувањето златни шипки се смета за попрофитабилно.

Откако беа намалени тарифите во Индија, цените на мало паднаа и побарувачката се зголеми. Се чини дека тој тренд ќе продолжи и во наредните месеци, рече Ајој Чаула, управен директор на одделот за накит на Титан.

Глобалните цени достигнаа рекордно високо ниво минатата недела, но домашните цени во Индија во понеделникот беа околу 765 евра за 10 грама, што е под јулскиот рекорд од 74.731 рупии.

Намалувањето на давачките го промени расположението кај потрошувачите кои го одложуваа купувањето поради растот на цените, велат аналитичарите.

Цената на златото можеше да достигне ново рекордно високо ниво над 80.000 рупии доколку не се случеше намалувањето на царината, но сега се тргува под тоа ниво, што најверојатно ќе ја зголеми побарувачката следниот месец поради фестивалот Онам, заклучија тие.

Цената на златото на светскиот пазар минатата недела достигна рекордно ниво од 2.550 долари за унца.