На полноќ почна изборната кампања за претседателските избори закажани за 24 април. Демократската унија за интеграција во оваа прилика ги повикува политичките партии-учеснички на изборите на 24 април да водат мирна и демократска кампања, заснована на конкретна програма и понуда. Ги повикуваме активистите и граѓаните да се воздржат од можни провокации кои можат да дојдат од различни кругови кои сакаат да ја дестабилизираат државата, и да влеат страв и предизвикаат криза во пресрет на претседателските избори на 24 април, соопшти ДУИ.

Демократската унија за интеграција и Европскиот фронт, во соопштението наведуваат дека се убедени дека на 24 април кандидатот за претседател, Бујар Османи, исто како и на 8 мај – на парламентарните избори, коалицијата „ДА за Европа, НЕ за Русија“ ќе извојуваат најубедлива победа забележана досега во Северна Македонија.

Најавија дека програмата и понудата на идниот претседател, Бујар Османи ќе биде претставен од град во град, село по село и врата до врата, за да покажат, како што велат, дека гласот за кандидатот под реден број 4, е глас за европска Македонија и за безбедна и просперитетна иднина на секој граѓанин на државата.

„Со желба за европска кампања, Демократската унија за интеграција ги повикува граѓаните масовно да ја поддржат кандидатурата на Бујар Османи и со ова да го продолжиме евроатлантскиот пат и најбрзото можно членство на Северна Македонија во Европската Унија“, стои во соопштението.