Папата Франциско денеска ја изрази својата „длабока тага“ по убиството на седумте хуманитарни работници во израелскиот напад врз Газа и повторно повика на прекин на огнот и ослободување на заложниците киднапирани од палестинската група Хамас.

„Се молам за нив и нивните семејства. Го повторувам мојот повик за исцрпеното и напатено цивилно население да добие пристап до хуманитарна помош и заложниците веднаш да бидат ослободени“, рече pапата на крајот од целонеделната општа аудиенција во Ватикан.

Тој повторно побара „итен прекин на огнот“. Израелската армија денеска призна „сериозна грешка“ по нападот во кој загинаа седум работници на хуманитарната невладина организација @World Central Kitchen# во Појасот Газа, во трагедија која ја запрепасти меѓународната заедница.

Неколку земји и организации, вклучително и ОН, кои предупредија на „непочитување на меѓународното хуманитарно право“, го осудија нападот.

Борците од палестинската група започнаа напад врз јужен Израел на 7 октомври во кој загинаа најмалку 1.160 луѓе, главно цивили, според извештајот на АФП заснован на официјални податоци. Израел соопшти дека биле киднапирани околу 250 луѓе, од кои 130 се уште се притворени, вклучително и 34 кои загинале во Газа.

Најмалку 32.916 луѓе, главно цивили, се убиени во израелските операции и непрестајните бомбардирања, соопшти Министерството за здравство на Хамас.