Разорен земјотрес го погоди Тајван во 7:58 часот по локално време. Епицентарот на земјотресот бил на 18 километри источно од Хуалиен, најголемиот округ во земјата лоциран на источниот брег. Активирани се многу свлечишта, некои згради делумно или целосно се урнаа, најмалку седум лица загинаа, а над 700 се повредени. Во Тајван, во градот Тајтунг, има и една Хрватка која раскажала каков бил моментот на земјотресот.

„Моментално сум во Тајтунг, град на источниот брег на Тајван. Овде сум со уште четворица другари. Околу осум часот сите нè разбуди алармот на нашите телефони. Отпрвин мислев дека е аларм, но тоа беше предупредување за безбедност од земјотрес. И тогаш сите почувствувавме треперење. Нашата зграда изгледаше безбедна, па не излеговме надвор, особено затоа што бевме предупредени кога пристигнавме во Тајван дека земјотресите се релативно чести овде. Целата зграда се тресеше, веднаш се сетив на загребскиот земјотрес. Гледам дека магнитудата беше над 7 степени, но овде во Тајтунг помалку се чувствуваше. Пишуваше 6,4 кога погледнав во телефонот“, изјави таа за 24sata.hr.

Потоа дојде уште едно предупредување.

„Следниот аларм дојде за околу 10 минути. Предупредување за цунами. Тајванските колеги почнаа да не контактираат и да прашуваат дали сме во ред. Тие не беа исплашени. Рекоа дека денеска не одиме на плажа“, рече таа.

Јапонскиот центар за земјотреси објави дека неколку мали цунами стигнале до јужната префектура Окинава и подоцна го укинале предупредувањето за бранови. Филипинската сеизмолошка агенција, исто така, издаде предупредување до жителите на крајбрежните области и ги повика да бараат засолниште на повисоките места.