Американската тенисерка Даниел Колинс ја освои титулата на Мастерсот во Мајами, Таа во финалето ја победи четвртата тенисерка во светот Елена Рибакина од Казахстан по два сета 7:5, 6:3.

Колинс, 53. на ВТА листата ја освои титулата по два часа и две минути игра. Американката прв пат во кариерата освои титулата на турнир од серијата 1.000.

Во првиот сет тенисерите добиваа гемови на свои сервиси до последниот 12-ти гем кога Колинс направи брејк и поведе во мечот.

Таа добро го започна вториот сет и по брејк во вториот гем поведе со 2:0. Рибакина веднаш го врати брејкот, по што и двете добија гемови на свои сервиси до осмиот, кога Колинс направи нов брејк и поведе со 5:3.

Американската тенисерка потоа сервираше за победа и ја искористи четвртата меч топка.

Колинс стана најслабо рангираната тенисерка која освоила титула на Мајами опен, а од понеделник ќе се искачи на 22. место на ВТА листата.

Колинс на почетокот на годината изјави дека на крајот на сезоната ќе ја заврши кариерата.

Рибакина остана на седум титули, а втора година по ред загуби во финалето на турнирот во Мајами.