Социјалистичкиот премиер на Шпанија Педро Санчез во четврток треба да добие нов четиригодишен мандат, откако се гласаше во парламентот каде има огромна поддршка од 179 од вкупно 350 пратеници, соопштено е денеска во Мадрид.

Претседателката на шпанскиот парламент Франсина Арменгол денеска на прес-конференција најави дека расправата за формирање влада ќе се одржи в среда, а ќе се гласа в четврток.

Шпанската социјалистичка работничка партија (ПСОЕ), предводена од Санчез и со 121 пратеник, во последните недели беше во тешки преговори со групата на левичарски партии Сумар и регионалните партии на Каталонија, Баскија, Галиција и Канарските Острови. Партијата во петокот ги заврши преговорите со тоа што на секој од нив им вети нешто во замена за поддршка од вкупно 58 пратеници.

Откако на сепаратистичката партија на прогонетиот поранешен каталонски премиер Карлес Пуџдемон, Заедно за Каталонија (JxCAT), и беше ветено помилување за организирање на забранет референдум за независност во 2017 година, протести се одржаа низ Шпанија.

Законот за амнестија, чиј текст се уште не е објавен, шпанскиот парламент треба да го усвои до среда. Треба да ги прекине сите правни постапки против повеќе од 1.000 лица за дела од 2012 до 2023 година.

Шпанија, која претседава со Европската унија до јануари, има рок до 27 ноември да формира влада. Во спротивно, Шпанците ќе одржат нови избори во јануари.