Поддршката на земјите од Г7 на Украина во војната со Русија нема да биде засегната од интензивирањето на блискоисточниот конфликт, најави денеска јапонската министерка за надворешни работи Јоко Камикава, за време на подготовките на министрите за надворешни работи за разговори преку видеоврска со претставници на Киев.

„Нашата посветеност да продолжиме со строги санкции против Русија и силната поддршка за Украина воопшто не е поколебана, дури и кога ситуацијата на Блискиот Исток се влошува“, рече Камикава, додавајќи дека претставниците на Г7 ќе разговараат со украинскиот министер за надворешни работи преку видео врска, пренесува Ројтерс.

Групата седум богати нации (Г7) составена од Велика Британија, Канада, Франција, Германија, Италија, Јапонија и САД, како и ЕУ, денеска и утре ќе се состанат во Токио за да разговараат за прашања како што се војната во Украина и војната во Израел против палестинската милитантна група Хамас.