Украинските сили постигнаа напредок во источната област на нивната контраофанзива против руските окупаторски сили, но се под притисок на север, соопштија денеска украинските власти.

Руските сили поддржани од авиони за напад Су-35 почнаа да напаѓаат долж линијата на фронтот во правец на Макиивка во регионот Луганск, изјави портпаролот на источната група сили на Украина.

„Најтешкото подрачје е секторот Лиман-Купјанск“, изјави портпаролот Илија Јевлаш за украинската телевизија, мислејќи на двата града кои украинските сили ги вратија кон крајот на минатата година, но сè уште се под руски напад.

„Таму се зголеми интензитетот на нападот. Непријателот избра нова точка – Макиивка – и ги насочува сите свои главни напори во таа насока. Се разбира, ние ги одбиваме и непријателските напади и предизвикуваме штета на силите и опремата“.

Борбите периодично се разгоруваат во близина на Лиман и Купјанск, а Украина вели дека Русија прераспоредила повеќе од 110.000 војници во областа.

Руски проектил погоди продавница и соседно кафуле во четвртокот во селото Хроза, западно од Купјанск, при што загинаа 51 лице додека жителите присуствуваа на комеморацијата за убиениот украински војник.

Исто така, на исток, украинските сили возвраќаат во близина на разурнатиот град Бахмут, кој беше заземен од руските сили во мај по неколкумесечни борби.