Иранскиот министер за надворешни работи Хосеин Амирабдолахијан ја истакна подготвеноста на Исламската Република да ги подобри односите со Холандија и со Европската унија.

За време на состанокот на маргините на 78-та сесија на Генералното собрание на Обединетите нации во Њујорк, тој ѝ честиташе на својата холандска колешка Ханке Бруинс Слоат за нејзиното неодамнешно назначување за министер за надворешни работи на Холандија.

„Слично на нашите добри односи со поранешниот министер за надворешни работи, ние сме подготвени да ги продолжиме разговорите и да ја зајакнеме соработката со вас“, рече иранскиот министер, пренесува агенцијата „ИРНА“.

Амирабдолахијан го истакна потенцијалот за проширување на соработката во областа на животната средина и водата, како и во индустриските области.

Високиот дипломат ги истакна и значајните напори и вредните искуства на Иран во борбата против тероризмот и рече дека земјата е подготвена за дијалог и размена на искуства во оваа насока.

Бруинс Слот укажа на долгогодишните дипломатски односи меѓу Иран и Холандија и ја изрази својата подготвеност за зајакнување на билатералните врски, пренесува иранската агенција.