Во служба на иселениците, кои масовно пристигнуваат во родниот крај, во овој период од годината, веќе функционира Центарот (канцеларијата) за дијаспора во Дебар.

– Центарот просторно е сместен во општинската зграда и функционира со работно време од 8 до 16 часот секој работен ден. Доколку има потреба работното време ќе биде продолжено, а ќе работи и во сабота. Целта е да се олеснат административните процедури во општината а се ангажирани три лица, кои се во можност да одговорат на барањата на иселениците, изјави за МИА, Или Мирзо, секретар на општина Дебар.

Дебар е печалбарски крај, со многубројна дијаспора во САД или над 15 илјади и земјите на Европската унија, каде живеат повеќе илјади дебрани.

-Голем број од нив традиционално летниот одмор го минуваат во родниот крај. Во име на локалната власт на сите им посакувам топло добредојде и пријатен престој меѓу своите во нивната татковина, посочува Мирзо.

Општина Дебар е една од 23 локални самоуправа кои минатата година го прифатија предлогот на Министерството за дијаспора, а договорот го потпиша на 11 ноември.