Германските сојузни покраини побараа од сојузната влада да воведе прецизно дефинирано кривично дело за поттикнување малолетници на самоповредување.

Целта на оваа мерка е поефикасно да се спречат таканаречените предизвици на социјалните мрежи во кои децата и младите се самоповредуваат.

На TikTok, Instagram и други платформи, корисниците често се охрабруваат да извршуваат разни „задачи“, како што се консумирање екстремно лута храна или качување на опасни места.

Покраините укажуваат на загриженоста во врска со „видовите дигитално влијание врз децата и младите што би можеле да ги поттикнат на самоубиство или на тешко самоповредување“.

„Повиците за учество во таканаречениот ’Blackout Challenge‘ (Предизвик на губење свест) јасно ги илустрираат опасностите што произлегуваат од тоа: тешки повреди, трајно оштетување на мозокот и смрт.“

Сепак, се забележува дека постоечкото кривично право има ограничувања кога станува збор за „воспоставување контакт, стекнување доверба и постепено поместување на границите на она што е прифатливо“.

Едно момче од Мекленбург-Западна Померанија завршило во болница откако друг ученик го гушел до губење свест во училишниот двор, изјави покраинската министерка за правда, Жаклин Бернхард.