Компанијата „Пацифик пауер“, која снабдува со електрична енергија повеќе од 800.000 корисници во делови од Орегон, Вашингтон и Калифорнија, ги повика граѓаните да се подготват за можни прекини на струјата што би можеле да траат и до 72 часа.

Предупредувањето следува по најавите за серија силни невремиња што би можеле да го погодат западниот дел на САД, со обилни врнежи, силни налети на ветер и опасни услови на море. Метеоролошкиот тим на компанијата внимателно го следи невремето, кое во текот на ноќта би можело да зафати делови од Орегон и Калифорнија.

Од компанијата соопштија дека екипите се подготвени да интервенираат доколку дојде до прекини во снабдувањето, но ги повикаа граѓаните да имаат план за вонредни ситуации и залихи за најмалку три дена.

На корисниците им се препорачува да ги проверат и ажурираат контакт-податоците, да се пријават за известувања за прекини на струјата преку СМС, електронска пошта или телефон, да ги наполнат мобилните телефони и другите уреди и да имаат подготвен комплет за итни случаи.

Компанијата ги повика граѓаните да ги следат информациите за дефектите и очекуваното време за повторно воспоставување на снабдувањето преку нејзината интернет-страница и мобилната апликација.

Посебно предупредување беше упатено за паднатите електрични кабли и други водови. Од „Пацифик пауер“ нагласија дека тие можат да бидат под напон дури и кога не искрат, па граѓаните не треба да им се приближуваат, ниту да дозволуваат домашните миленици да дојдат во нивна близина.