Првата подводна соларна електрана во светот е изградена во Кина и тестирана на отворено море. Работи на длабочина од 10 метри.

Како што пишува „Саут Чајна морнинг пост“, овој подводен енергетски систем отвора нови можности за снабдување со енергија за време на подводни операции. Успешните тестови покажаа дека сончевата светлина може да се претвори во електрична енергија дури и во слабиот „самрак“ на океанските длабочини.

Електраната од нов тип е изградена од тим експерти од Универзитетот Јунан. Научниците користеле специјални панели дизајнирани да го апсорбираат сино-зелениот дел од светлосниот спектар. Тој дел од спектарот е избран затоа што водата го апсорбира помалку.

Уредот потопен во вода ги полнел батериите и го напојувал LED панелот неколку часа. Се очекува панелите да можат да работат долго време, а според пресметките на научниците, секој од нив треба ефикасно да функционира во морската средина неколку години.

Претходните подводни сончеви системи, според истражувачите, биле наменети за многу мали длабочини – најмногу околу два метра, што е далеку од условите потребни за нивна практична примена, објави Спутник.

Научниците веруваат дека новата технологија би можела да се користи за напојување на подводни сензори, детектори, камери и комуникациски системи, како и подводни роботи и други уреди.

Сепак, можностите не завршуваат под вода. Се претпоставува дека нивната употреба би можела да отвори нови можности за истражување на вселената и просторот околу Земјата.

Сепак, сето ова е сè уште во иднина. Истражувачите сè уште треба да го решат проблемот со изолацијата на панелите од надворешната средина и да ги испитаат последиците од долгорочната изложеност на морска вода.

Затоа новите сончеви панели сè уште чекаат серија дополнителни и потешки тестови.