Во Клиничкиот центар и во болницата „Св. Наум Охридски“ по вчерашното невреме лекарска помош побарале 33 повредени. 22 побарале помош во „Св Наум Охридски“, а 11 во Клиничкиот центар „Мајка Тереза“. Најголем број од повредените биле со скршеници, еден бил опериран, а меѓу повредените е и еден турист.

„ Во Клиничкиот центар ‘Мајка Тереза’, односно во ТОАРИУЦ, има згрижено 11 повредени од синоќешното невреме, од кои тројца се со посериозни искршеници и се третираат соодветно на клиниката“, рече министерот за здравство Сашо Клековски денес при посетата на болницата „Св. Наум Охридски“.

Небојша Настов, директор на болницата „Св. Наум Охридски“ вели дека од 22 повредени во невремето кај нив, на болничко лекување се задржани двајца.

„Од тие 22 пациенти, двајца се примени на болничко лекување, останатите се третирани поликлинички, со полесни повреди. Од оние двајца, еден пациент е веќе опериран во текот на ноќта со скршеница во предел на дланката, и има уште еден пациент којшто е странски државјанин, турист, којшто е повреден при пад на дрво. Има повреди во пределот на карлицата, но не е потребен оперативен третман, што значи дека е планиран за конзервативен, односно неоперативен третман“, рече директорот Настов.

Министерот Клековски кажа дека невремето нанело штети на многу здравствени установи. Паднати дрвја има во Клиничкиот центар и во Психијатриската болница во Бардовци која неколку часа беше без струја, значителни штети има покривот на клиничката болница во Штип, а се прават проценки на штетата на покривната конструкција ГОБ „8 Септември“ во Скопје.