Министерството за надворешни работи на Иран го осуди запленувањето на иранскиот трговски брод „Туска“ од страна на американските сили во понеделник, нарекувајќи го „нелегален и варварски“ чин. Техеран го пријави инцидентот кај генералниот секретар на ОН и кај Меѓународната поморска организација, велејќи дека тоа го крши меѓународното право и договорот за прекин на огнот, објави Ал Џезира.

Во соопштението објавено од официјалната новинска агенција ИРНА на Иран, министерството побара итно ослободување на бродот, неговиот екипаж и нивните семејства, тврдејќи дека запленувањето било „проследено со заплашување“.

U.S. Marines depart amphibious assault ship USS Tripoli (LHA 7) by helicopter and transit over the Arabian Sea to board and seize M/V Touska. The Marines rappelled onto the Iranian-flagged vessel, April 19, after guided-missile destroyer USS Spruance (DDG 111) disabled Touska’s… pic.twitter.com/mFxI5RzYCS

— U.S. Central Command (@CENTCOM) April 20, 2026

„Предупредуваме за многу опасните последици од овој нелегален и криминален чин од страна на Соединетите Американски Држави и ја нагласуваме потребата од итно ослободување на иранскиот брод, неговите морнари, екипажот и нивните семејства“, се вели во соопштението.

Иран, исто така, ги повика меѓународните организации да дадат „цврст и сериозен одговор“. „Исламската Република Иран несомнено ќе ги искористи сите свои капацитети за да ги брани националните интереси и безбедност и да ги заштити правата и достоинството на Иранците. Јасно е дека целосната одговорност за понатамошното влошување на ситуацијата во регионот лежи кај САД“, соопшти министерството.

Од друга страна, Централната команда на САД објави фотографии од бродот, наведувајќи дека „Туска“ бил запленет по „обид за пробивање на американската поморска блокада“.

Претседателот на САД, Доналд Трамп, изјави за време на викендот дека американските сили презеле „целосна контрола“ врз бродот во Оманскиот Залив откако, како што рече, „направиле дупка во машинската просторија“.

Инцидентот претходи на нова рунда преговори
Инцидентот се случува во време на неизвесност околу одржувањето на втората рунда разговори меѓу Вашингтон и Техеран, која е закажана да се одржи оваа недела во Пакистан.

Како дел од американската делегација, потпретседателот на САД, Џ.Д. Венс, треба да отпатува во Исламабад, додека Иран сè уште не го потврдил своето учество. Сепак, висок пакистански функционер изјави за Ројтерс дека неговата земја добила „позитивен сигнал“ од Техеран за евентуално присуство на разговорите.