Помошник за здрав живот: Xiaomi Mi Band 5 ќе ве натера да го подобрите секојдневниот живот со помалку стрес


Со усовршувањето на технологијата која што од ден на ден сѐ повеќе се развива, добиваме паметни алатки кои што ни го олеснуваат нашето секојдневие. Со оглед на тоа дека во периодот на корона вирусот физичката активност ни се намали, иновациите за подобрување на тој сегмент од нашиот живот ни се и те како добредојдени. Овој пат, имавме можност да го тестираме паметниот фитнес тракер Xiaomi Mi Band 5. Пакувањето на Xiaomi Mi Band 5 содржи тракер со ремче и кабел за полнење.



Band 5 го задржува изгледот на својот претходник Band 4 кој е прогласен за најдобриот финтес тракер во светот во својата категорија. Tракерот има можност да се оддели од ремчето кое што е изработено од високо квалитетна гума која перфектно се вклопува на раката, а во комбинација со малата тежина која заедно е околу 23 грама, создаваат удобно чувство кога е на зглобот.

Поврзувањето на новиот Mi Band 5 паметниот фитнес тракер е едноставно. Го скенирате QR кодот со вашиот паметен телефон, кој веднаш ве води до местото каде што може да се инсталира Mi апликацијата која што се синхронизира со тракерот. Истата се одвива преку Bluetooth 5.0.  Минимална поддршка на оперативен систем на вашиот паметен телефон за да може да се користи Xiaomi Mi Band 5, е Android 5.0 и IOS 10.0.

Покрај сите податоци кои што можат да се видат и да се споредат во апликацијата, постои и продавница за бесплатни теми кои што ќе ви го подобрат корисничкото искуство. За да се сите содржини чисто и читливо претставени пред корисникот, Xiaomi се погрижиле за добрата резолуција и живописните теми со (1.1) инчниот  AMOLED дисплеј кој има 126×294 резолуција. Добрата страна на дисплејот на Xiaomi Mi Band 5 е во тоа што за разлика од својот претходник, овој модел има зголемена видливост на дисплејот за 20%.