Зеленски бара од САД итно одобрение за ракети „Патриот“: Украина се соочува со недостиг


zelenski-depositphotos_904758486_xl.webp
Facebook
Twitter
LinkedIn
Telegram
WhatsApp
OK

Украинскиот претседател Володимир Зеленски побара од САД да ја одобрат испораката на ракети за системите за воздушна одбрана „Патриот“, кои веќе се платени од сојузниците на Украина. Тој предупреди дека земјата се соочува со недостиг од овие ракети, неопходни за пресретнување на руските балистички напади.


Според податоците што ги објави Зеленски, Русија во текот на минатата недела ја нападнала Украина со околу 2.700 дронови, речиси 1.460 наведувани воздушни бомби и 165 ракети од различни видови. Нападите погодиле 20 региони, а руски цели сè почесто се енергетската и другата клучна инфраструктура. Поради оштетувањата на електроенергетскиот систем, многу жители остануваат без струја, вода и греење.

Зеленски го повика Вашингтон да ја одобри испораката на ракетите купени во рамките на програмата на НАТО, преку која европските и другите партнери финансираат набавка на американско оружје за Украина.

На крајот на октомври, украинскиот претседател изјави дека во текот на 2026 година земјата од САД ќе добива просечно само 12 ракети месечно за системите „Патриот“, оценувајќи дека тоа не е доволно за одбрана од сè почестите напади.

Според Зеленски, неколку европски земји се подготвени да ѝ отстапат ракети од сопствените залихи, но за нивниот трансфер е потребно одобрение од Вашингтон, бидејќи станува збор за американско оружје.

Тој и претходно предупреди дека американската администрација ги одложува одобренијата за испораките. На крајот на октомври посочи дека дел од пратките чекаат одлука од американскиот министер за одбрана Пит Хегсет.

Facebook
Twitter
LinkedIn
Telegram
WhatsApp
OK