Бројот на загинати во силниот земјотрес што ја погоди Јапонија вчера се искачи на 48, соопшти штабот за катастрофи во префектурата Ишикава.

Официјални лица велат дека бројот на жртви би можел да продолжи да расте, јавува Би-Би-Си.

Илјадници воен персонал, пожарникари и полицајци од целата земја беа испратени во најпогодената област на полуостровот Ното во префектурата Ишикава.

Сепак, спасувачките напори се отежнати поради тешко оштетените и блокирани патишта, а властите велат дека е тешко да се процени целосниот обем на штетата.

Многу железнички линии, фериботи и летови до областа се суспендирани. Аеродромот Ното е затворен поради оштетување на пистата, терминалот и пристапните патишта.

„Потрагата и спасувањето на погодените од земјотресот е трка со времето“, рече премиерот Фумио Кишида за време на итниот состанок за катастрофата.

Пожарникарите се борат со пожарите во неколку градови и се обидуваат да ослободат повеќе луѓе затрупани во урнати згради, соопшти јапонската агенција за управување со пожари и катастрофи.