Жена од Дорсет која 68 години работела во локална продавница за чевли неодамна добила отказ.

Џил Корник (82) почнала да работи во продавницата „Кларкс“ во англискиот град Бландфорд во далечната 1956 година кога имала само 14 години. Работела во иста продавница секој ден во следните 68 години.

Џил дури го одложила својот меден месец во 1969 година за да присуствува на обука за продажба, а кога нејзиниот син Џејсон се родил во 1975 година, го одгледала во продавницата.

Сепак, минатата недела, Џил беше отпуштена откако компанијата објави дека веднаш ќе ја затвори продавницата.

Многу клиенти дојдоа последниот работен ден да се збогуваат со Џил. Многумина донесоа цвеќиња и чоколади за да и се заблагодарат за долгогодишната услуга.

– Минатиот четврток ни беше кажано дека продавницата се затвора во понеделник. Тоа беше малку шок за сите нас. Почнав да работам во 1956 година и оттогаш сум во истата продавница. Се чувствувам добро и се надевав дека ќе работам уште неколку години пред да се пензионирам. Тоа е вистински срам – изјавила Џил.

Старите муштерии за малку ќе плачеа при разделбата.

– Многумина беа на работ на солзи. Меѓу клиентите имав четири генерации од исто семејство, на кои им помогнав да изберат чевли. Мислам дека сега ќе одморам и ќе одам повеќе на плажа. Не сакам да патувам некаде поради работа. Ќе работам за добротворна организација или нешто слично. Ја сакав мојата работа. Тоа беше мојот живот. Со години живеев над продавницата и го носев син ми горе – вели Џил.

Нејзината прва работа во Кларкс беше чистење на чизми во 1956 година. Во текот на својата долга кариера била менаџер и мајстор чевлар.

Џил, која е вдовица од 2016 година, вели дека поминала само неколку боледувања во седум децении работа и дека била на одмор три месеци во 2020 година за време на карантинот на Ковид.

Таа вели дека секогаш имала добар однос со своите клиенти и дека била „преоптоварена“ од пораките за поддршка што ги добивала од нив. Нејзиниот омилен дел од работата беше да им помага на децата да набават нови чевли за училиште.

– Наша искрена благодарност до сите членови на тимот на продавницата „Бландфорд Форум“ за нивниот придонес и посветеност во обезбедувањето извонредна услуга за клиентите. Посебна благодарност до Џил. Нејзините 68 години услуга и посветеност на нашите клиенти се многу ценети од сите во „Кларкс“. На Џил и посакуваме се најдобро – изјави портпаролот на компанијата.