Мајка, која беше извлечена од урнатините на нејзиниот уништен дом со своето бебе старо 18 дена, во Венецуела, раскажа за Би-Би-Си како нејзиниот син ѝ помогнал да преживее катастрофален земјотрес.
Дајана Патино рече дека нејзиниот син Хуан Давид ѝ дал „мотивација да остане будна и смирена“. „Се додека тој беше жив, знаев дека ќе преживеам. Од време на време го допирав носот за да проверам дали сè уште дише“, рече таа.
Снимките од спасувањето станаа вирални, а малиот Хуан Давид стана симбол на надеж во Венецуела, која беше погодена од два силни земјотреси во кои загинаа најмалку 1.450 луѓе. Десетици илјади луѓе сè уште се водат како исчезнати во она што привремениот претседател го опиша како „најбрутална природна катастрофа“ во историјата на земјата.
„Бев прикована за мебел“
Потрагата по преживеани продолжува, но надежите за пронаоѓање повеќе луѓе се намалуваат секој ден. Во клиника во главниот град Каракас, Дајана ги опиша драматичните часови што ги поминала под урнатините, држејќи го својот син и молејќи се да биде спасен.
Таа била во својот стан на осмиот кат во крајбрежниот регион Ла Гваира и миела садови кога се случил земјотресот. Веднаш истрчала кај својот син, мислејќи дека е „благ потрес“.
„Се чувствував како да летам. Потоа се чувствував како да тонам во вода и земја, а потоа паднав во јама каде што бев заробена. Не знам како не го испуштив бебето бидејќи се чувствував како да летам. Ме прикова мебелот“, рекла таа.
Почнала да вреска во паника, но набрзо сфатила дека никој не може да ја чуе. „Си реков дека нема да ја трошам енергијата, ќе врескам кога е потребно, кога ќе слушнам гласови или чекори во близина“, рекла таа.
Таа додаде дека не знае како останала толку мирна, иако левата нога ѝ била заробена под бетон, а главата притисната на карпа. Рече дека пронашла надеж кога почувствувала Библија под себе. „Тука започна моето патување за преживување“, рече таа.
Во темнината на урнатините, видела „зрак светлина што личеше на месечина“. Спасувањето дошло откако го слушнала својот брат како ја вика. „Си реков дека ова е мојата единствена шанса. Викав со сета сила, врескав: ‘Тука сум’. Тој рече: „Те најдов и ветувам дека нема да си одам додека не те извлечам“, се присети таа.
Следеше тешка спасувачка операција, која ги извлече мајката и детето од урнатините во четврток вечерта. Дајана претрпе повреди на двете нозе, додека нејзиниот син помина со полесни повреди.
#Internacional || 🇻🇪 En medio de la tragedia, también hay esperanza
Un bebé de apenas 18 días de nacido fue rescatado con vida en Playa Grande, La Guaira, tras el devastador terremoto que sacudió Venezuela. #CBTelevisión pic.twitter.com/w2QFCEcw6I
— CB Televisión (@cb_television) June 27, 2026
Семејниот дом беше уништен
Нејзиниот сопруг Герсон се враќал дома и го паркирал автомобилот кога се случил земјотресот. Успеал да скокне преку оградата и да избега. Кога видел што останало од нивната зграда, помислил на најлошото. Моментот кога неговата сопруга и дете биле спасени го опишал како „чудо“.
На снимката од спасувањето, Герсон може да се види како ги затвора очите и ја крева главата кон небото додека го држи синот во раце, преплавен од емоции. „Беше неописливо. Мислев дека се мртви. И кога го видов мојот син, се чувствував како да сум прероден. Не можев да поверувам, почувствував како мојот живот се враќа кај мене“, изјави тој за Би-Би-Си.
Семејниот дом беше уништен, како и сите нивни работи, а семејството остана без нивното куче, кое сè уште е исчезнато, но велат дека ќе „почнат одново“. „Изгубивме речиси сè, но еве нè, ќе го обновиме сè што изгубивме“, објави Герсон.
