Шефот на Државната агенција за обнова и развој на инфраструктурата на Украина, Мустафа Најем денеска поднесе оставка.

„Сам ја донесов одлуката поради системски пречки кои не ми дозволуваат да продолжам ефикасно да ги извршувам моите овластувања“, рече Најем на својот канал Телеграм.

Според неговите зборови, од ноември минатата година, тимот на Агенцијата почнал да се соочува со постојано противење, отпор и создавање лажни пречки, вклучително и доцнење на исплатата на одбранбените утврдувања.

Најем ја поздрави работата на неговата агенција за обнова на патишта и мостови во повторно заземените области, изградба на водни линии по уништувањето на браната Каховка и заштита на енергетската инфраструктура на Украина поради руските воздушни напади.

Министерот за инфраструктура Олександар Кубраков рече дека Најем не разговарал со него за смената. Според Ројтерс, и Кубраков и Најем, кој беше назначен во јануари 2023 година, помогнале да се открие корупцијата во земјата.

„Не ја исклучувам можноста со текот на времето да има обиди за дискредитација на нашата работа. Всушност, тоа се случува веќе подолго време“, рече Кубраков.