Соединетите Држави повикаа на истрага за смртоносниот израелски воздушен напад врз училиште управувано од Агенцијата на ОН за палестински бегалци (УНРВА) во централна Газа и му порачаа на Израел дека мора да биде целосно транспарентен.

Портпаролот на американскиот Стејт департмент Метју Милер изјави дека дури и ако израелската војска имала намера да ги таргетира милитантите на Хамас, тврдењата на децата убиени во нападот покажуваат дека нешто тргнало наопаку.

Милер рече дека е право на Израел да ги гаѓа милитантите на Хамас, додека во исто време ја нагласи обврската да се минимизира штетата на цивилите и да се преземат сите можни чекори за да се направи тоа.

Тој рече дека САД виделе извештаи дека 14 деца биле убиени во нападот. „Ако е вистина дека се убиени 14 деца, тие не се терористи“, рече Милер.

Сето тоа се факти кои треба да се проверат и тоа сакаме да се случи, додаде тој.

Според УНРВА, училишната зграда во бегалскиот кварт Нусејрат била користена како засолниште за итни случаи.

Здравствените власти во Газа, под контрола на Хамас, соопштија дека најмалку 30 луѓе биле убиени во нападот во средата вечерта, а повеќето од жртвите биле жени и деца. Хамас соопшти дека загинале 40 луѓе. Првично не беше можно самостојно да се провери оваа информација, пренесува Дпа.

Израелската војска објави дека верува дека 20 до 30 членови на Хамас и на палестинскиот исламски џихад биле во три училници во училишна зграда во бегалската населба Нусејрат.