Американскиот државен секретар Марко Рубио го опиша договорот со Данска за иднината на Гренланд како заштита од растечкото кинеско влијание врз овој стратешки важен арктички остров.

„Фантастичен договор“
Гостувајќи на „Фокс њуз“, Рубио го нарече договорот „фантастичен“ и истакна дека тој „нема рок на траење“. „Тој ни овозможува да воспоставиме онолку воени бази колку што ни се потребни“, рече тој.

Договорот, исто така, им овозможува на САД и на Данска заеднички да ги проверуваат идните странски инвестиции.

Рубио изјави дека целта на тој дел од договорот е да се избегне ситуација во која еден ден ќе сфатат дека „таму (можеби) нема кинеска војска, но нивните компании ги поседуваат сите пристаништа и целото земјиште“.

Кинескиот претседател Ши Џинпинг во среда доаѓа во Вашингтон во повеќедневна посета и на средба со својот американски колега Доналд Трамп. Договорот за Гренланд би можел да ја засени нивната средба, пишува Ројтерс.

Договорот меѓу САД, Данска и Гренланд беше потпишан денеска, на маргините на Генералното собрание на Обединетите нации во Њујорк.