Во Исланд наскоро може да се случи нова вулканска ерупција, предупредија денеска исландските власти. Исландската метеоролошка служба Ведурстофа денеска предупреди дека е зголемена веројатноста за нова ерупција на полуостровот Рејкјанес и дека тоа би можело да се случи во следните две недели, па дури и за неколку дена.

Жестока ерупција се случи таму во средината на јануари. За прв пат по речиси половина век, лавата уништи куќи.

Според метеоролошката служба, моделите базирани на ГПС-податоци покажале дека под областа Сварценги се акумулирани речиси 6,5 милиони кубни метри магма и дека магмата наскоро ќе го достигне истиот волумен како и минатомесечната ерупција.

Значајна опасност му се заканува на градот Гриндавик, кој беше евакуиран во средината на јануари.