Авиокомпаниите и аеродромите побараа суспензија на новиот биометриски систем за гранична контрола на ЕУ за време на шпицот на летната сезона, велејќи дека некои летови полетуваат полупразни, а патниците се мачат чекајќи во редици и до пет часа. Во писмо до претседателката на Европската комисија, Урсула фон дер Лајен, тие побараа можност за привремено суспендирање на проверките поради страв дека ситуацијата значително ќе се влоши за време на најпрометниот летен период, објавува The Guardian.

„Достигнавме критична точка“, соопштија во писмо здружението ACI Europe, кое ги претставува аеродромите, и Airlines 4 Europe и Меѓународното здружение за воздушен транспорт (IATA), кои ги претставуваат авиокомпаниите.

„Патниците веќе се принудени да чекаат во долги редици пред терминалните згради и на отворените платформи бидејќи граничните контроли не можат доволно брзо да ги обработуваат пристигнувањата. Авиокомпаниите се соочуваат со полупразни авиони на затворањето на портите, додека патниците се заглавени во редици за гранични контроли“, се додава во соопштението.

Здруженијата ја повикаа Комисијата да им дозволи на аеродромите „целосно да ги суспендираат“ проверките „секогаш кога бројот на патници ќе го надмине оперативниот капацитет на објектите за гранична контрола“ во текот на јули и август. Тие рекоа дека граничните служби, аеродромите и авиокомпаниите се „под неодржлив притисок“ и повикаа на „итна интервенција пред ситуацијата дополнително да се влоши за време на шпицот на летната патничка сезона“.

Системот, кој постепено се воведува од октомври минатата година, бара од државјаните кои не се членки на ЕУ да се регистрираат со отпечатоци од прсти и фотографија по пристигнувањето на аеродромот. Сепак, неговата имплементација наиде на значителни проблеми. Грција ги суспендираше биометриските проверки за британските патници до септември за да спречи застој во текот на летото.

Во мај, француската полиција привремено ги суспендираше дополнителните проверки во пристаништето Довер, а минатата недела шефот на аеродромите во Рим изјави дека ќе мора да го суспендира системот за државјани кои не се членки на ЕУ за да се избегне катастрофа во текот на летните месеци.

Се очекува европските аеродроми да се справат со околу 40 милиони патници повеќе во јули и август отколку во претходните два месеци. „Комисијата и земјите-членки мора да ја земат предвид реалноста на моменталната ситуација и со што ќе се соочи нашиот систем за воздушен транспорт во наредните недели“, се предупредува во писмото.

фото/Depositphotos