Папата Лав XIV пристигна во Перу, земја во која речиси 20 години работел како мисионер и која зазема посебно место во неговото срце. Како што пренесува АФП, Перу е последната станица од неговата интензивна турнеја низ Јужна Америка, во чии рамки тој веќе ги посети Уругвај и Аргентина.

Папата – кој е Американец по потекло, но поседува и перуанско државјанство – слета синоќа, околу 23:00 часот (по македонско време), во воздухопловната база „Каљао“ во близина на Лима. Сè до понеделник, тој има исполнет распоред со посети, миси и средби низ целата земја – од сушниот север, преку Андите, па сè до Амазон.

По пристигнувањето, папата Лав XIV со „папамобил“ се упати кон Претседателската палата, каде што се сретна со перуанската претседателка Кејко Фуџимори, ќерка на поранешниот претседател Алберто Фуџимори. Потоа, во Националниот голем театар, тој одржа говор пред владини претставници и претставници на граѓанското општество.

Следни станици: Чиклајо, Куско и Пукалпа
По Лима, во текот на следните два дена, Папата ќе го посети Чиклајо – град во северно Перу каде што служел како бискуп речиси осум години, од 2015 до 2023 година.

Поглаварот на 1,4 милијарди католици во светот таму ќе отслужи миса на рамнината Пиментел, пространа и сушна област долж брегот на Тихиот Океан, оддалечена околу петнаесет километри од Чиклајо. Локалната бискупија очекува присуство на 1,5 милиони верници.

Во недела, тој ќе го посети Куско, поранешната престолнина на Инките, сместена на Андите на надморска височина од 3.400 метри. Во попладневните часови ќе отпатува за Пукалпа, во регионот на Амазон, каде што, меѓу другото, е предвидено да се сретне со претставници на домородните заедници.