– Светот мора да се подготви за поинтензивни топлотни бранови, предупредија денеска Обединетите нации, бидејќи северната хемисфера се приближува до максималните температури.

„Овие појави ќе продолжат да се интензивираат и светот мора да се подготви за поинтензивни топлотни бранови“, изјави Џон Наирн, експерт на Светската метеоролошка организација на ОН на прес-конференција во Женева.

Тој додаде дека феноменот Ел Нињо само ќе ја зголеми појавата и интензитетот на екстремните топлотни бранови.

Во Северна Америка, Азија, Северна Африка и во медитеранскиот басен, неколку дена оваа недела температурите ќе надминат 40 степени Целзиусови.

„Еден од значајните феномени што ги забележавме е дека бројот на симултани топлотни бранови на северната хемисфера се зголеми за шестпати од 1980-тите. Овој тренд не покажува знаци на намалување“, рече експертот.

Како што оцени, топлотните бранови ќе имаат сериозно влијание врз здравјето и животот на луѓето.