Израелскиот премиер Бенјамин Нетанјаху изјави дека војната против Иран, палестинското движење Хамас и либанскиот Хезболах не е завршена, велејќи дека Израел мора да продолжи да дејствува против она што го нарече „иранска оска“.

Во интервју за израелскиот „Канал 14“, Нетанјаху оцени дека Израел е посилен од кога било и дека заканите за безбедноста на земјата се значително намалени, но нагласи дека конфликтите не се завршени и дека Израел сè уште има работа да заврши. „Никогаш не завршува. Ако сакате да живеете на Блискиот Исток, мора да бидете многу силни. Израел е посилен денес од кога било“, рече Нетанјаху, објави „The Times of Israel“.

Според него, во текот на претходните години, Израел им нанесе тешки удари на Хамас, Хезболах и Иран, но, како што додаде, ќе продолжи да се соочува со „она што останало од иранската оска“. Нетанјаху истакна дека целта на Израел е да ги отстрани преостанатите закани и во исто време да ги искористи можностите за постигнување мировни договори во регионот.
Изјавата на израелскиот премиер уследи по предупредувањето на министерот за одбрана Израел Кац дека вооружен конфликт меѓу Израел и Иран може повторно да избувне доколку Техеран испали ракети кон израелска територија. Кац изјави дека на израелската армија ѝ е наредено да биде подготвена за независна операција против Иран, доколку е потребно.

Тој рече дека Израел не сака да ги попречува дипломатските напори на Вашингтон кон Техеран, но дека, кога станува збор за одбраната на земјата, нема компромис ниту во Либан ниту во Иран. Според Кац, Израел силно ќе одговори на каков било напад и нема да прифати ситуација во која Иран ќе ја таргетира израелската територија без последици.

Пораката на Нетанјаху потврдува дека Израел не ги смета воените операции против Иран и неговите сојузници во регионот за завршени, туку ги претставува како долгорочна безбедносна борба во која, како што тврди израелското раководство, земјата мора да ја задржи својата воена предност и способност за брз одговор.