Кинеската војска спроведе заедничка поморска и воздушна воена вежба околу спорниот гребен Скарборо во Јужното Кинеско Море, соопшти во неделата.

Вежбата се одржала во водите и воздушниот простор околу гребенот, кој Кина го нарекува Хуангјан Дао, додека Филипините полагаат право на него и го именуваат Бајо де Масинлок.

Јужната команда на Народноослободителната армија на Кина во соопштение објавено на платформата Вичет наведе дека операцијата била неопходен одговор на активностите на „одредени земји“, за кои Пекинг тврди дека го нарушуваат регионалниот мир и стабилност.

Според кинеската војска, целта на вежбата била „проверка и унапредување на борбените способности за заштита на кинескиот територијален суверенитет и поморските права и интереси“.

Филипинската амбасада во Пекинг засега не одговорила на барањето за коментар за кинеската воена вежба околу спорниот гребен.