Размена на палестински затвореници и израелски заложници во Газа може да се изврши само по прекин на огнот, изјави денеска истакнатиот функционер на Хамас Осама Хамдан, додека досега неуспешните преговори во Каиро меѓу милитантната група, Египет и Катар продолжуваат.

На прес-конференција во Бејрут, Хамдан ги повтори условите на неговата група за договорот: крај на израелската воена офанзива, повлекување на војниците од Појасот Газа и враќање на протераните Палестинци, кои беа раселени во Појасот Газа, во нивните домови.

„Во изминатите два дена движењето го презентираше својот став за предлогот даден од братските посредници на Катар и Египет. Ги повторивме нашите услови за примирје – целосно повлекување од Појасот и враќање на бегалците, особено на север“, рече тој.

Хуманитарната состојба е особено тешка во таа област. Се верува дека стотици илјади жители остануваат таму и покрај израелската наредба за евакуација. Обединетите нации не испратија хуманитарна помош на северот од 23 јануари. Израелските власти одбија пристап до конвоите на ОН, врз кои пукаа израелски војници, пишува Ројтерс.

САД, најголемиот поддржувач на Израел за воена и дипломатска помош, во саботата го извршија својот прв во серијата воздушни фрлања хуманитарна помош во Газа.

Хамдан им рече на новинарите дека тие му кажуваат на Вашингтон дека „запирањето на испораката на оружје за Израел е поважно од испраќањето помош“.