Неколку стотици луѓе се собраа денеска пред резиденцијата на израелскиот премиер Бенјамин Нетанјаху, носејќи транспаренти и барајќи негова оставка.

Протестот во Цезареја, која се наоѓа меѓу Тел Авив и Хаифа, е еден од неколкуте собири во последните недели за кои демонстрантите велат дека се со цел да го зголемат притисокот врз Нетанјаху да распише избори.

Амос Малка – поранешен шеф на Дирекцијата за воено разузнавање на израелските одбранбени сили, го отвори собирот со говор во кој го обвини Нетанјаху дека „ги напуштил заложниците“ кои ги држел Хамас во Газа.

„Да знаеја семејствата колку е мал јазот што Нетанјаху одбива да ја затвори (во преговорите со Хамас) – ќе експлодираа. Ова е уште еден доказ за неговата неподобност да служи“, рече Малка.

Тој за „Тајмс оф Израел“ изјави дека вината за нападот на 7 октомври ја делат многу официјални лица, но дека Нетанјаху е единствениот виновен за се што се случило оттогаш.