Германија ќе испрати тројца воени офицери за поддршка на следењето на прекинот на огнот во Газа, а тие ќе дејствуваат во рамките на координативен центар во Израел предводен од САД, објави германското Министерство за одбрана. Германскиот воен персонал ќе служи невооружен, со цел да придонесе за спроведување на мировниот план, пишува TRT World.

„Германската влада го поддржува планот од 20 точки и мировниот процес за Газа со тоа што ќе помогне во стабилизирањето на прекинот на огнот и спроведувањето на договорените мерки“, се вели во соопштението на Министерството за одбрана објавено во саботата. За почетната фаза, Бундесверот ќе испрати двајца штабни офицери и бригаден генерал уште следната недела.

Тие ќе служат во униформа, но без оружје, во Цивилно-воениот координативен центар (CMCC) во јужен Израел.

Мировниот план од 20 точки, предложен од американскиот претседател Доналд Трамп, ја доби поддршката од светските сили и регионалните актери на самитот во Шарм ел Шеик, Египет, минатиот понеделник.

Во првата фаза од планот, Хамас ослободи 20 израелски затвореници, додека Израел ослободи речиси 2.000 палестински затвореници. Израелските сили почнаа да се повлекуваат од густо населените области, а хуманитарната помош почна да пристигнува во Појасот Газа.

Подоцнежните фази од планот предвидуваат демилитаризација на Хамас, воспоставување привремено технократско управно тело и распоредување на Меѓународни сили за стабилизација за обезбедување на границите.