Француската влада соопшти дека нејзините стратешки резерви на маски се доволни за најмалку три месеци во случај на епидемија, додека властите се обидуваат да ја смират јавноста поради загриженоста поврзана со хантавирусот, пренесува „Анадолија“.

Од кабинетот на премиерот Себастијан Лекорну наведуваат дека државните резерви се доволни за заштита на земјата најмалку три месеци во случај на епидемиски бран, и дека дополнителни приватни и јавни залихи би можеле да го продолжат овој период.

Се додава дека Франција има капацитет за домашно производство од 2,6 до 3,5 милијарди маски годишно, што според властите е доволно за одговор на евентуална пандемија слична на Ковид-19.

Властите истакнуваат дека хантавирусот е значително помалку заразен од Ковид-19 и дека во Франција е потврден само еден случај.

Хантавирусот е ретка болест која најчесто се пренесува преку глодари или нивниот измет, а според СЗО, смртноста може да достигне 40 до 50 проценти кај ризични групи.

Фото: Depositphotos