Американските сенатори и од Демократската и од Републиканската партија изразија загриженост за можноста вештачката интелигенција (ВИ) да се користи злонамерно или да се изврши напад со биолошко оружје.

За време на сослушувањето пред поткомитетот на Комитетот за правосудство на Сенатот, извршниот директор на компанијата за вештачка интелигенција Антрофик, Дарио Амодеи, изјави дека ВИ може да им помогне на злонамерните луѓе да развијат биолошко оружје дури и без да го имаат потребното знаење за тоа.

Некои чекори во производството на биолошко оружје вклучуваат знаење што не може да се добие од Гугл или учебници и бара специјализирано знаење, наведе Амодеи, чија компанија соработуваше со експерти за биосигурност на проучување на биолошките ризици што ги носи вештачкиот интелект.

– Откривме дека современите алатки за вештачка интелигенција можат да изведат некои од овие чекори, посочи Амодеи, додавајќи оти ВИ се уште не е способна да помогне во развојот на биолошко оружје, што тој го нарече „среднорочен“ ризик.

– Ние веруваме дека ова претставува сериозна закана за националната безбедност на САД, бидејќи им овозможува на многу повеќе актери да вршат напади од големи размери со биолошко оружје, истакна Амодеи.

И претседателот на Поткомитетот Ричард Блументал, демократ, изрази загриженост.

Специјалистите кои ги развиваат овие системи предупредуваат на опасноста човештвото да исчезне. Целта на оваа дебата е да се постават основите за изготвување закон. Да се ​​премине од основните принципи до конкретни препораки, наведе Блументал.

Републиканскиот сенатор Џош Хејли повика на заштитни мерки „кои ќе обезбедат дека новите технологии всушност имаат корист за американскиот народ“.

Сослушувањето уследи неколку дена откако компаниите за вештачка интелигенција, вклучително ОпенАИ, Алфабет и Мета Платформс, се обврзаа доброволно пред Белата куќа да имплементираат мерки како што се водени ознаки генерирани од вештачката интелигенција за да ја зголемат безбедноста на технологијата.