Руските напади врз украинските градови мора веднаш да престанат, изјави денес портпаролот на американскиот Стејт департмент, осудувајќи го еден од најголемите руски воздушни напади врз Киев.

„Ги видовме овие извештаи и внимателно ја следиме ситуацијата, вклучително и нападите што ја погодија породилната болница во Одеса. Руските напади врз украинските градови мора веднаш да престанат. Ги осудуваме овие напади и изразуваме најдлабоко сочувство до жртвите и семејствата на сите погодени“, рече портпаролот.

Нови масовни руски воздушни напади во текот на ноќта беа насочени кон украинските градови Киев и Одеса, при што загина едно лице и беше погодена породилна болница, соопштија локалните власти.

Во Одеса, 59-годишен маж беше убиен, а најмалку четворица други беа повредени во напади врз станбени згради во центарот на градот. Според гувернерот Олег Кипер, погодена е и породилна болница.

Во Киев, четири лица беа повредени во воздушен напад што градоначалникот Виталиј Кличко го опиша како „масивен“, при што се пријавија пожари во неколку згради.