Првиот ден од Новата година донесе фантастичен натпревар на „Енфилд“. Ливерпул го победи Њукасл со 4:2. Головите беа постигнати во второто полувреме.Исто така Салах не искористи пенал, ВАР поништи два гола, голманот на Њукасл, Дубравка имаше 11 интервенции.

Мохамед Салах не реализираше пенал во 21.минута, Дубравка го одбрани неговиот удар, но тој му донесе предност на Ливерпул во 49.минута.

За само три минути потоа, Нуњез не реализираше две добри шанси. Казната Ливерпул го стигна во 54.минута кога Исак го совлада Алисон.

Во 63. минута Дубравка сопре одличен удар на Дијаз, а неполна минута подоцна го одбрани и ударот на Нуњез. Предноста на Ливерпул му ја врати Куртис Џонс во 74.минута, а четири минути подцна гол постигна и Коди Гакпо.

Неизвесноста во 82. минута ја врати Свен Ботман, но сите дилеми околку победникот го реши Салах со гол од пенал.

Ова беше 150. гол на Мохамед Салах во Премиер лигата. Тој е само петтиот играч во историјата кој постигнал 150 или повеќе првенствени голови за еден клуб. Пред него тоа го направија Хари Кејн за Тотенхем, Серхио Агуеро за Манчестер сити, Вејн Руни за Манчестер Јунајтед и Тиери Анри за Арсенал.