Лука Јовиќ со своите голови на неколку натпревари му донесе важни победи на Милан, со кои клубот остана во трката за шампионската титула во Серија А.

Јовиќ постигна седум гола на 19 натпревари за Милан, што е негов најдобар учинок во изминатите четири години што ги мина во Реал и Фиорентина. Тој навести враќање во формата во која играше во Ајнтрахт, што го забележа и Милан и најави дека ја разгледува можноста да го задржи напаѓачот подолго од претходно договореното.

Јовиќ има договор со Милан до крајот на сезоната, со можност за продолжување на една или две сезони. Според италијанските медиуми, челниците на Милан имаат намера да разговараат за една од двете можности за продолжување на договорот со менаџерот на српскиот репрезентативец.

„Газета дело Спорт“ објави дека средбата е закажана за крајот на неделата.

Според овој извор, Јовиќ е подготвен да остане во Милан, но ќе бара финансиски подобар договор.

Преговорите ги олеснува фактот што на крајот од сезоната најверојатно клубот ќе го напушти искусниот Оливие Жиру, па на Милан ќе му биде поисплатливо да му ја зголеми платата на Јовиќ отколку да купи нов напаѓач.