Кошаркарот на Далас маверикс, Макси Клебер изјави дека ќе го пропушти претстојниот Мундијал и нема да биде дел од германската репрезентација поради изјавите на Денис Шредер (Торонто).

– Моите цели во кошарката и играњето за Германија се да бидам 100 отсто здрав, да му помогнам на тимот да победи и да бидам добар соиграч. Многу тешката одлука да не играм минатото лето беше поради повреда со која играв во последните четири месеци од сезоната 2021/22 во НБА. Требаше целосно да се опоравам и да се одморам. Да бев здрав, ќе бев среќен и горд што ќе играм за нашата репрезентација. Го започнав ова лето со целосна намера и мотивација да се приклучам на репрезентацијата на Светското првенство. Сепак, неодамнешните непријатни и неприфатливи изјави за мене во јавноста 100 отсто јасно ставија до знаење дека не сум многу добредојден во репрезентацијата. Немам намера да ја уништам добрата тимска хемија од минатото лето. Затоа решив дека ќе биде подобро за сите да не играм. Му посакувам успех на тимот, рече Клебер.

Шредер претходно ја критикуваше одлуката на Клебер да го пропушти Евробаскет 2022 и рече дека враќањето на Клебер во националниот тим ова лето ќе биде неправедно кон другите играчи.