Сојузот на синдикати на Македонија (ССМ) повика на првомајски протест за враќање на трошоците за храна и превоз и зголемување на платите во првите 100 дена од новата влада. Претседателот на ССМ, Слободан Трендафилов најави дека пораките испратени од првомајскиот протест треба да бидат црвен аларм за сите оние кои ќе го очекуваат гласот на работниците на осми мај.

„Ние работниците излегуваме на протест и на Први мај ќе побараме враќање на трошоците за храна и превоз, право кое го изгубивме во 2009 година поради бруто системот за пресметка на плати во Македонија. Ќе бараме зголемување на платите и тоа во првите 100 дена од новата влада, особено зголемување на минималната плата на најмалку 450 евра, онолку колку што истата изнесува во регионот за да не се доведеме во ситуација нашите граѓани, работниците од Македонија да градат туѓи економии и да работат за туѓи интереси“, рече претседателот Трендафилов.

Трошоците за храна и превоз кои ССМ бара да се вратат во пресметките за плата, изнесуваат 20 отсто од просечната плата. Според сегашните пресметки, ако од минималната плата се одбијат овие трошоци и давачките кои сега се плаќаат, излегува дека работниците кои имаат минимална плата, работат за 14.000 денари.

„Бараме 20 отсто од просечната плата за трошоци за превоз и за храна ако имаме предвид дека секојдневно поскапуваат не само реагенсите туку и трошоците за храна. Ако се има предвид синдикалната кошничка, над 20.000 денари изнесуваат трошоците за прехранување на едно четиричлено домаќинство. Зборуваме за леб и за вода, не за повеќе. Сметаме дека трошоците за храна и за превоз треба да се вратат во платите на работниците ако имаме предвид дека 22.500 е минималната плата од месец март, доколку ги пресметате трошоците за храна и за превоз, согласно даночните ослободувања, ќе видите дека немате плата ниту 14.000 денари. Заради тоа работниците го очекуваат од нас барањето за враќање на трошоците за храна и за превоз“, рече Трендафилов.

Тој потсети на првомајскиот протест од 2018 година организиран под мотото „Гаси скара, касни плата“ за кое рече дека важи и денес оти доцнат плати во Македонски шуми, работниците во културата преку протести издејствуваа усогласување и исплата на платите, а повеќе од 20.000 работници, според податоците од Управата за јавни приходи, земаат плати пониски од минималната.

„Да не се лажеме, ако не излезете на протест нема да добиеме ништо. Колку ќе дојдеме, колку ќе излеземе на протест, толку и ќе добиеме. Доколку очекувате во наредните пет години некој кога ќе ја води државата да ве слушне сте се излажале. Денеска е моментот кога треба да излезете на улица и да кажете што барате од сите тие кои очекувате да ја водат државата“, повика Трендафилов.

Заедно со протестот, Трендафилов најави дека работниците ќе го бранат и Работничкиот дом од институциите кои го преземаа. „Нека дојдат и нека си ја пробаат среќата“, порача тој.

Протестот Ќе почне во 11 часот пред Работничкиот дом ќе продолжи пред Собранието, пред Стопанската комора и ќе заврши пред Владата каде работниците ќе ги упатат пораките, ќе кажат зошто не се задоволни и ќе им кажат на оние кои го чекаат гласот од нив дека треба да се погрижат повеќе за работниците.