Општина Битола пригодно го одбележа 20 мај, денот кога во 1836 година во Битола е формирана првата противпожарникарска единица, денес востановен како Ден на македонските пожарникари.

Според востановената традиција, градоначалникот на Општина Битола, Тони Коњановски и претставници на Советот на општината, положија цвеќе пред спомен плочата на територијалната противпожарна единица во овој град, најстарата единица во државата и на Балканот, формирана во Битола, со повелба на Румелискиот Валија, донесена на 20 мај 1836 година.

-Денес кога се одбележуваат 187 години, од формирањето на противпожарната единица, сакам да го честитам Денот на пожарникарите, да им се заблагодарам за пожртвуваноста, храброста, хуманоста и солидарноста, при сите интервенции, кога е потребно нивно делување за заштита на животот и зачувување на безбедноста на населението и материјалните добра, при пожари и други непогоди. Како локална самоуправа, остануваме посветени на работата на создавање подобри услови за нашите пожарникари, за што покрај подобрување на опременоста и возниот парк, активно работиме и на реализација на проектот за изградба на нова противпожарна зграда, со цел нашите пожарникари, да добијат соодветни и многу подобри услови за работа, посочи Коњановски.

Битолските пожарникари јавно се аблагодарија за неодамнешната донација на нова опрема и потсетија на нивното мото „Огнот е добар слуга, но лош господар“.