На средбата што со вработените на дебарската Територијална противпожарна единица, ТППЕ, ја оствари градоначалникот Хекуран Дука, меѓу другото рече дека нивната пожртвуваност, подготвеност и професионалност е достојна за почит.
Откако од блиску беше запознат со текот на работите околу рекострукцијата на објектот во кој е сместена единицата, тој вети дека за „дебарските херои“ локалната власт и понатаму ќе води посебна грижа и ќе дава соодветна поддршка.
– Задоволство ми е што денеска бев во посета на вашата единица, која максимално е посветена на заштитата од пожари, во спроведување на вашата бесценета и благородна мисија. Вашата пожртвуваност, подготвеност и професионалност во секој обид да се спаси имотот на граѓаните, зафатен од пожар, е достојна за почит. Огромната благодарност за тоа што постоите, што сте достапни во секој миг од денот. И во иднина ќе ја имате целосната поддршка од општината, како во исплатата на заслужената плата така и условите за работа со оптимални стандарди. Заедно одиме напред, им порача Дука на пожарникарите.
Заблагодарувајќи се Командирот на единицата Џетан Мифтароски изрази задоволство од поддршката и грижата што локалната власт на Дебар ја покажува за единицата, последно и со проектот за реконструкција на објектот, изграден пред повеќе децении.
Меѓу другото направи и пресек на интервенциите кои ги реализирале во изминатиот период од годинава.
-Во изминатиот период од годинава евидентирани се 25 интервенции, наспроти 63 во истиот период минатата година.
Од вкупниот број 15 се на објекти, главно поради запалени оџаци, 5 се на отворен простор, тука влијание имаа и врнежите од дожд, една на сообрајќајно средство и четири технички интервенции, рече тој.
Додаде дека во моментов единицата има 14 вработени, соодветен возен парк и добра опрема. Интервенираат не само на подрачјето на општина Дебар, туку и општините Центар Жупа и Маврово и Ростуше.
