Нов ребаланс на Буџетот само по два месеци од последниот. Тоа ја потврдува катастрофалната состојба на државната каса и дебаклот на економските политики на Мицкоски.
Се случува тоа што го најавивме, предупредуваат од СДСМ.

„Буџетската дупка е огромна, 900 милиони евра. Владата нема доволно пари за плати, пензии и тековни обврски. Следуваат нови долгови врз грбот на народот.

Веќе Владата се задолжи со нови 250 милиони евра, за буџетски потреби до крајот на годината. Не за враќање стари кредити, не за развојни инвестиции, туку за покривање на недостигот во државната каса.

Тоа е резултатот од економските политики на Мицкоски: Буџет што се полни со кредити, додека граѓаните слушаат бајки за економски успеси“.

Според опозициската партија, бајките на Мицкоски за „трета економија во Европа“ паднаа во вода.

Според партијата дефицитот во Буџетот е 900 милиони евра, дупката во ПИОМ достигна една милијарда евра.

Од таму оценуваат дека наместо да обезбеди стабилни приходи и одговорно трошење, Владата трупа долгови за да ги покрива основните обврски.

„Со новото задолжување јавниот долг достигнува 11 милијарди евра, а со долговите кон ЈПДП и другите јавни претпријатија надминува 63% од БДП.

Должничко ропство. Мицкоски го зголеми долгот за 4 милијарди евра, само за две години. Половина од вкупниот долг на државата во изминатите 30 години.

Кредитот не е приход, туку тешка обврска што ќе ја враќаат граѓаните, работниците и следните генерации“.