Француската книжевна сцена се најде во центарот на скандал откако Телисон Орељен, писател роден на Хаити и претставен како нова книжевна сензација, беше обвинет дека користел вештачка интелигенција (ВИ) за да го напише својот прв роман, пишува Би-Би-Си.
Орељен ја доби наградата Prix du Roman Fnac, првата од книжевните награди доделени во текот на сезоната, за романот „Или ова или смрт“.
Тој е исто така во потесен избор за наскоро доделените Гонкур и Ренодо, најпрестижните годишни награди за литература на француски јазик.
Сепак, оваа недела малку позната група наречена Balance ton Claude тврдеше дека книгата е „скоро целосно“ напишана со помош на вештачка интелигенција, што авторот го негираше, објавува „Vijesti.me“.
„Тестиравме неколку пасуси, од различни делови од ракописот, и секој пат добивме ист резултат: 100 проценти ВИ“, изјави групата на Икс.
Според групата, чие членство е непознато, анализата е спроведена со програмата Панграм, за која тврдат дека е „убедливо најточна“, со речиси занемарлива можност за грешка.
Орељен, кој е роден во Хаити и се преселил во Монтреал во 2010 година, веднаш ги негираше обвинувањата.
„Отсекогаш сум го сакал творештвото и литературата. Не гледам зошто би чувствувал потреба да користам машина“, изјави тој за весникот „Либерасион“ и додаде дека заедно со својот издавач „подготвува документација“ за да докаже дека ја напишал книгата автентично.
Издавачката куќа Грасет, исто така, излезе во негова одбрана, наведувајќи дека обвинувањата се „ужасно навредливи за писател со извонредна животна приказна“, чија „креативност е оригинална и силна“.
Романот е за наставник кој бега од бандитско насилство во Хаити и неговите авантури пред конечно да пристигне во Канада, каде што повторно го открива „правото да дише без страв“.
Критичарите на Панграм и другите детектори на вештачка интелигенција тврдат дека тие се несигурни – различни програми често даваат различни резултати по анализата на истите текстови.
Овие алатки всушност не знаат кој или што напишал одреден текст. Наместо тоа, тие бараат шеми што често се појавуваат во текст генериран од вештачка интелигенција, но истите шеми можат да се појават и во човечкото пишување.
Истражувањата покажаа дека детекторите за вештачка интелигенција можат погрешно да го означат текстот напишан од луѓе како содржина генерирана од вештачка интелигенција, но исто така можат да го пропуштат текстот што всушност бил произведен од вештачка интелигенција, особено ако подоцна бил уреден или парафразиран.
Некои исто така тврдат дека овие програми се базираат на стандардизиран јазик – англиски или француски – и затоа не можат точно да толкуваат текстови што користат дијалекти од места како Карибите.
Сепак, групата „Баланс тон Клод“ тврди дека е докажано дека Панграм погрешно го означува текстот генериран од вештачка интелигенција само еднаш на секои 24.400 анализи.
Најновите детектори повеќе не го споредуваат текстот со други текстови за да утврдат дали се случил плагијат. Наместо тоа, тие анализираат веројатности и статистички податоци за да утврдат дали одредени јазични шеми укажуваат на употреба на вештачка интелигенција.
