Алекс Марку (40), кој синоќа во Драч со часови ги држеше во заложништво своите две малолетни деца, додека пукаше со калашников во станот, наводно рекол „како ги зел децата за да ги заштити“.

Првите резултати од истрагата покажуваат дека тој ги земал децата како заложници додека бил под дејство на наркотици, но се чекаат резултатите од истрагата, а полицијата се уште истражува кој бил мотивот за ваквиот драматичен чин.

Во овој момент не се знае дали уапсениот татко има психички проблеми и каква е состојбата во семејството.

Соседите ја слушнале пукотницата околу 2 часот и 20 минути и веднаш повикале полиција, која брзо дошла на местото на настанот. Утврдено е дека пукањето од автоматско оружје се случило во изнајмен стан, кој Алекс го изнајмил пред една недела.

Полицијата веднаш започнала преговори со него, но Алекс одбил да го спушти оружјето и да ги предаде децата. Тој испукал неколку истрели во самиот стан и од терасата.

Во раните утрински часови полицијата успеала да влезе во станот, а Алекс се предал полугол. Децата биле пронајдени неповредени.